O Centro Cultural Lustres Rivas vai dar cabida en xullo a unha nova exposición: Ecléctica, da ribeirense Carmen Sampedro. Poderase visitar entre o 1 e o 29 de xullo.
Trátase dunha mostra de pintura e poesía integrada pola serie INA (en alusión ao alcume da súa finada nai), na que, logo de ter experimentado en anteriores ocasións por un variado inventario de xéneros e fórmulas, a autora decántase polo monopolio exclusivo do óleo. Ademais, compón a proposta un libro poético con dez poesías da artista, de tal xeito que a sonoridade da palabra irrompe e completa a expresividade das imaxes.
A apertura da mostra está prevista para este sábado ás 12.30 horas.
Estará aberta de luns a venres de 10 a 14 e de 19 a 21 horas e os sábados de 10 a 14 horas. A entrada é gratuíta.
Carmen Sampedro (Ribeira, 1956) é mestra de formación, estando actualmente xubilada. Expuxo por primeira vez en Malpica no 2013. En 2019 obtivo o primeiro premio do Concurso de Pintura e Poesía en el Camino, na Estrada, e no 2021 alcanzou o segundo premio no mesmo certame.
Até o de agora Sampedro ten participado en 80 exposicións colectivas e 11 individuais.
É membro activo do colectivo Galeoska (Galegos e galegas Koa Arte).
