O veleiro Mascato volverá navegar as augas da ría da Arousa, coa saída dende A Pobra do Caramiñal. A concelleira do Turismo en funcións, Charo Varela, explicou que o reforzo do turismo náutico “é unha das liñas de traballo por seguir para diversificar a oferta de actividades para o verán de 2023”.
Neste senso, ás travesías en catamarán para coñecer o Parque Nacional Marítimo-Terrestre das Illas Atlánticas toca sumar a experiencia da navegación a vela que posibilita apreciar o patrimonio medioambiental, marítimo e paisaxístico dende outra perspectiva.
As excursións pola costa celebraranse aos sábados e domingos dos vindeiros dous meses. Serán nos días 15, 16, 22, 23, 29 e 30 de xullo; e 5, 6, 12, 13, 19 e 20 de agosto. A duración do traxecto é dunha hora e media e as saídas establécense en quendas de mañá e de tarde: ás 11.00, 13.00, 17.00 e 19.00 horas.
O prezo é de 15 euros por persoa adulta, mentres que para menores de 12 anos se reduce aos 10 euros, cun desconto para as familias.
As prazas son limitadas e deberase efectuar a reserva previamente no punto de información turística (situado na Casa Mariñeira), no enderezo electrónico turismo@apobra.gal ou nos teléfonos de contacto 671090262 e 687482835.
