Este mércores 21 de xuño a Asociación Boirense de Empresa celebra unha nova xornada encamiñada a mellorar a competitividade, a eficiencia, a rendibilidade e a visibilidade das empresas locais. Trátase da xornada Os 20 principios fundamentais das neurovendas, coa que se pretende mostrar as máis recentes e destacadas técnicas para “conquistar a mente e vender máis”. Será no salón de actos da patronal entre as 10.00 e as 14.00 horas.
“Seguimos ofrecendo a posibilidade de asistir a un dos mellores cursos de formación que se poden cursar na actualidade e da man dun dos profesionais máis destacados desta especialidade, a neurociencia, poremos o foco en como esta disciplina pode achegar novas oportunidades e transformar as maneiras de entender das persoas consumidoras gracias ao avance tecnolóxico e os descubrimentos”, explican dende a asociación a propósito desta nova xornada, que axudará ás empresas locais a “optimizar o xeito de prestar servizo procurando adaptalo ás expectativas, aos desexos e aos intereses de cada cliente, tanto real como potencial”.
Precisamente este é o obxectivo concreto desta formación: “Explicar de maneira sinxela como os últimos avances da neurociencia poden aplicarse aos procesos de venda para aprender a falarlle á mente, e non á xente, mellorar a eficiencia e conseguir vender moito máis dunha maneira máis produtiva, eficaz e rendíbel”.
Imparte Modesto Gómez, economista con 17 anos de experiencia profesional no mundo da comunicación, a mercadotecnia, as habilidades sociais, o desenvolvemento estratéxico, a xestión do talento e o emprendemento. Modesto é unha das figuras mais destacadas do panorama nacional en marketing (mercadotecnia), e ademais é escritor e articulista.
