Xuntos sumamos é o lema da nova campaña da Asociación Boirense de Empresarios (ABE) que está operativa (e presente a pé de rúa) dende este venres 2 de xuño. As e os protagonistas desta nova iniciativa de reivindicación das excelencias do tecido comercial local son 8 socios da patronal que posan xunto con outros tantos clientes amosando “a diversidade e variedade de negocios que podemos atopar en Boiro”, explicou a ABE. Os sectores visibilizados nesta campaña son o comercio minorista e maiorista, a Praza de Abastos, a hostalería, os servizos, a industria, a construción e os profesionais independentes. Todos estes ámbitos produtos estarán visíbeis en formato físico nos farois do concello en forma de pancartas e monólitos nas rúas peonís.
A maiores nesta ocasión elaboráronse dúas pancartas xigantes de 16 metros cadrados que estarán situadas na fachada da Praza de Abastos, en pleno centro da localidade.
O lema da campaña, #XuntosSumamos, incide por unha banda no carácter multisectorial da asociación e a capacidade que ten de aglutinar a todos os sectores produtivos e, pola outra, a capacidade de “estaren sempre ao lado dos clientes dos negocios asociados para seguir medrando”. A campaña física irá acompañada dunha campaña de mercadotecnia (marketing) dixital onde A ABE dará a coñecer a cada un dos protagonistas a través das fotos realizadas a caróns dos seus clientes.
Para complementar a campaña a ABE porá en circulación a través dos negocios asociados 2.000 bolsas de algodón que entregaranse gratuitamente aos clientes polas súas compras.
A iniciativa foi dada a coñecer nos seus detalles, este venres 2 de xuño, polo presidente da ABE, Daniel García, e o concelleiro de Comercio, Marcos Fajardo.
