Foto Juan Caballero
A xornada dominical da Regata Ramiro Carregal Rey supuxo un cambio de liderado na xeral do Gran
Trofeo Faro de Corrubedo, que de mans do Siradella, de Francisco Gude e César Álvarez, do Club anfitrión do Real de Portosín, pasou a outro barco da casa, o Bon III, de Víctor Carrión.
Tras a costeira entre Riveira e Portosín, chegaba a quenda das probas ao vento, das que só se puido validar unha das dúas programadas, ao cumprirse o tempo límite de saída, fixado polo Comité ás
tres da tarde.
Bocinazo con algo máis de media hora de atraso sobre o previsto, que eran as 12.00 h., debido a que a compoñente non se daba establecida no seu eixo, que ao final foi do 240, é dicir, vento do suroeste, rolando á esquerda e tendo que facer un cambio de percorrido. Houbo dous bordos, coa frota dividida, os uns pola dereita do campo e os outros pola esquerda. Tan só o Ronáutica Mariñas apostou polo centro, que igualou o seu resultado na quinta praza do primeiro día, nos Cruceiro/Regata.
O triunfo en Regata foi para o Siradella, de Francisco Gude e César Álvarez, de Portosín, co Moucho, de Daniel Ayaso, do Club Náutico e Deportivo de Riviera, na prata, pechando o caixón do podio o Corsario,
de Jorge Durán, do Club de Iates de Vilagarcía.
Nos Cruceiro/Regata gañou a xeral do seu grupo o Bon III, de Víctor Carrión, de Portosín, por diante do Kanala, de Ignacio Ecenarro, tamén do Real local, co Ziralla Primeiro, de Ramón Barreiro, do Ro Yacht Club, no bronce.
A Clase Cruceiro foi para o Cámping Ría de Arousa, de José Manuel Pombar, do Club Náutico Arousa Norte, que pechou a Carregal con dous primeiros. Seguiulle no podio o Orlando, de Gerardo Sánchez Brunete, do Ro Yacht Club. E foi terceiro o Galopín, de Manuel Franco, do Náutico de Riveira.
O Gran Trofeo Faro de Corrubedo entregoullo Ramiro Carregal a Víctor Carrión, armador e patrón do Bon III, ao adxudicarse a xeral da regata, e que defendía a grímpola de Portosín.
A entrega de premios converteuse nunha gran homenaxe a Ramiro Carregal, coa complicidade de 45 armadores que o agasallaron cunha escultura encargada ao Manuel Teira, quen glosou persoalmente ante o homenaxeado, a súa creación.
Presidiu a entrega Ramiro Carregal, acompañado de Jorge Arán, presidente da entidade social e deportiva do Real de Portosín, acompañado de José Luís Torres Colomer, presidente do Náutico de Riveira e colaborador da regata, así como, entre outras autoridades, a Tenente-Alcalde de Riveira, Mariola Sampedro; o Concelleiro de Turismo de Porto do Son, Manuel Dean; o Vicepresidente segundo da Real
Federación Galega de Vela, Pedro Piñeiro; e o Patrón Maior da Confraría de Pescadores de Portosín, Isaac Gaciño, entre outros.
Foto Juan Caballero
