Este sábado 27 de maio A Pousada da Galiza Imaxinaria (Boiro) acolle o concerto dun dos grupos de rock instrumental máis sobranceiros do panorama español: Toundra. A apertura das portas está prevista para as 21.30 horas. As entradas terán un custe de 13 euros na web da Pousada e (fisicamente) na tenda Baldani Concept Store e na Pousada. Na billeteira terán un custe de 15 de euros.
Toundra é unha banda xurdida en Madrid en 2007. Os seus temas salientan por moitos motivos, pero se algo os caracteriza é a ausencia de retrousos que corear, nin letras. O seu punto forte é un son contundente e rotundo, de longos desenvolvementos instrumentais que son capaces de envolver nas súas atmosferas ao público máis resistente e curtido. Teñen pasado por pequenas salas do país, e xa xiraron en Europa e en Estados Unidos. Ademais, pasaron por algúns dos festivais máis destacados do panorama estatal, como o Resurrection Fest, o Viña Rock ou o Primavera Sound.
