O Instituto Enerxético de Galicia (INEGA) comunicou ao Concello de Ribeira a concesión dun
total de 157.950 euros de fondos europeos Next Generation que permitirán a instalación de plantas de enerxía fotovoltaica en tres instalacións municipais: o edificio da UAD, o Complexo da Fieiteira e
o novo Auditorio.
A acción está enmarcada no Plan de Transición Enerxética Municipal, adscrito á súa vez ao plan de acción da Axenda Urbana de Ribeira Atlántica (que, aprobado por todos os grupos da Corporación no
pasado de decembro, marca a folla de ruta do Concello ata o ano 2030) encadrándose no vector Ribeira + Sostible.
O importe das axudas son de 74.925 euros para a Fieiteira e o Auditorio e de 8.100 euros para a sede da UAD, que foi recentemente remodelada, recibindo unha nova cuberta e unha nova envolvente
térmica. A potencia de instalación é de 99.900 kW nos dous primeiros inmobles e de 10.800 kW no último.
A instalación destas plantas fotovoltaicas súmanse á que se colocou na EDAR de Couso a principios do ano pasado e a que está prevista para a Casa Consistorial dentro das obras de rehabilitación
financiadas con fondos Next Generation dentro do Programa de Impulso á Rehabilitación de Edificios Públicos (PIREP) lanzado polo Ministerio de Transportes, Mobilidade e Axenda Urbana.
