A partir deste mércores, festivo en Galicia por celebrarse o Día dás Letras Galegas, as augas da ría de Muros e Noia convértense no epicentro da vela da comunidade, coa celebración do Campionato Galego da Clase ILCA, con preto dun centenar de rexistrados.
Convocados desde o Real Club Náutico Portosín, coa colaboración da Real Federación Galega de Vela, a cita desenvólvese en tres xornadas, a primeira delas este mércores, para continuar o sábado 20 e finalizar o domingo 21 deste mes de maio.
Ao peche da redacción desta noticia os rexistrados oficiais chegaban aos 75, sendo a previsión dos organizadores pechar o campionato cunha cifra moi próxima ao centenar.
Na modalidade do ILCA 4, antigo Láser 4.7 e a categoría máis xuvenil das tres, formalizaron a súa preinscrición 50 regatistas, dos que 26 son mozos e 24 mozas, mostrando unha balanza case perfecta na equidade entre homes e mulleres que compiten nesta disciplina.
En ILCA 6, anterior Láser Radial e modalidade olímpica, son 18 os participantes, dos que 15 son da categoría masculina e 3 da feminina, curiosamente rompendo o gradiente xa que segue sendo
olímpica en mulleres.
O ILCA 7, antigo Láser Standard, tamén segue sendo olímpico para os Xogos de Francia, en categoría masculina, dos que 7 son os rexistrados para a cita de Portosín.
En canto á representatividade de entidades náuticas, son unha quincena, con clubs como o Real Club de Mar de Aguete, Real Club Náutico de Sanxenxo, Monte Real Club de Iates de Baiona, Club Marítimo Oza, Mariña Coruña, Club Náutico Deportivo de Ribeira, Club Marítimo de Canido, Real Club Náutico da Coruña, Grupo Bazán, Real Club Náutico de Vigo, Club Náutico Castrelo de Miño, Comisión Naval de Regatas de Ferrol da Armada Española e os insulares do Real Club Náutico de Palma e Real Club Náutico Gran Canaria, por ser unha convocatoria aberta, contando con ampla representación do club anfitrión, o propio Real de Portosín.
O programa de competición contempla a celebración de 9 mangas, tres por xornada, das que, polo menos, un terzo terán que ser completadas para validar o campionato. O top ao arranque este mércores festivo está indicado no anuncio da regata para as 14.00 h.
Organiza o Real Club Náutico Portosín, en colaboración coa Real Federación Galega de Vela, a Secretaría da Clase ILCA, o Excmo. Concello de Porto do Son, a Secretaría Xeral para o Deporte da Xunta de Galicia, Gadis e Bonilla á vista.
Autor: Juan Caballero
