O Concello de Outes fixo hoxe presentación de tres proxectos cos que pretende mellorar a integración urbana do río Tins ao seu paso pola Serra de Outes. Estes proxectos, nos que o concello leva traballando dende o inicio do mandato, intégranse tamén no Plan de Reordenación de Espazos e Integración Ambiental do Río Tins, no marco da iniciativa Renatur-Outes, que elabora a Universidade da Coruña e financia a Fundación Biodiversidade con fondos NextGenerationEU.
O primeiro dos proxectos, que xa conta co financiamento do Plan de Sustentabilidade Turística da Ría de Muros e Noia, é o de Humanización da Praza do Cocnello e mellora da súa conexión co paseo fluvial. Con el preténdese recuperar esta histórica praza situada á beira da casa do concello, que nestes momentos atópase moi degradada. O orzamento do proxecto ascende a algo máis de 210.000 € que se financiarán integramente cos fondos sinalados. O segundo proxecto é o da Bancada para a conexión do paseo fluvial e a Casa da Cultura co centro urbano na Serra de Outes, co que se pretende mellorar a conexión e percepción do paseo fluvial da Horta do Muíño coa trama urbana da capital do concello. Neste caso o orzamento supera os 80.000 € e xa foi presentado para recibir financiamento do Programa Hurbe, da consellería de Medido Ambiente Territorio e Vivenda. Segundo indicou o alcalde, Manolo González, o obxectivo é asinar un convenio coa Consellería este mesmo ano 2023. Un terceiro proxecto será o dunha Nova pasarela sobre o río Tins, que servirá para conectar a Praza do Concello coa Rúa do Tines e dese xeito mellorar a conexión da Serra de Arriba e a Serra de Abaixo, a través da praza do concello. Neste caso o orzamento ascende a perto de 125.000 € e segundo apuntou Manolo González, o proxecto xa foi presentado á convocatoria do GDR Deloa así como a de mellora de infraestruturas turísticas da Xunta de Galicia, para o seu financiamento.
No acto de presentación acompañaron ao alcalde e á tenente de alcalde, os arquitectos Óscar Fuertes e Carlos Campos, amosándose un video que recrea o resultado final dos proxectos sinalados. Óscar Fuertes é profesor da UDC e é o responsable de elaborar o Plan de Reordenación de Espazos e Integración Ambiental do Río Tins, dentro proxecto Renatur-Outes. Fuertes indicou que se traballa tamén para unha cuarta intervención nunha zona actualmente degradada do río, á que se accede dende a Rúa do Tines, e que antigamente era usada como pequena praia fluvial. O arquitecto local, Carlos Campos, que é o autor dos proxectos de mellora da Praza do Concello e do da Bancada para conexión do paseo fluvial, indicou que cos mesmos se busca recuperar eses espazos para a cidadanía e mellorar a calidade de vida e o atractivo turístico da vila da Serra de Outes. O alcalde, Manolo González, amosou a súa satisfacción polos traballos presentados, indicando que supoñen un cambio transformador que agarda que se fagan realidade o antes posible.
Praza do Concello de Outes
