O PSOE de Boiro aposta pola renovación e o continuísmo na súa candidatura para as municipais do 28 de maio

03 Maio 2023

A agrupación socialista de Boiro deu a coñecer o equipo que acompañará a José Ramón Romero García, Martiño, nas vindeiras eleccións municipais de maio de 2023. O actual mandatario confirmou que manterá nos primeiros postos da súa candidatura aos concelleiros do goberno que o acompañaron nestes catro anos: Luis Ruíz, María Outeiral, Marcos Fajardo e Raúl Treus. “Os catro mostraron durante estes catro anos o seu compromiso e a súa dedicación por Boiro e os boirenses e seguirán formando parte do meu equipo a partir de maio”, anunciou Martiño. Aínda que haberá cambios e novas incorporacións, o actual rexedor quixo seguir contando cos actuais concelleiros para revalidar a alcaldía de Boiro.

No capítulo de logros conseguidos, Martiño destacou o importante traballo despregado por Luís Ruiz, que durante esta lexislatura exerceu como tenente de alcalde e estivo ao fronte das áreas de Urbanismo e Obras e de Facenda, e que acadou o desbloqueo das licencias urbanísticas, que tiñan un atraso de máis de dous anos, e a redución da débeda viva do concello en 1.500.000 euros, pasando de 5.500.000 euros a 4.097.965 euros nestes catro anos.

Tamén enxalzou o intenso labor desenvolvido pola delegada das áreas de Cultura, Educación e Persoal, María Outeiral, que “foi quen de volver a poñer a cultura no centro da xestión do Concello con actividades para todos os públicos e en todas as parroquias, ao fronte da área de Educación reactivou o Consello Escolar Municipal e na área de persoal logrou sacar adiante a estabilización de emprego coa que se van consolidar a 111 traballadores e traballadoras municipais”.

Polo que se refire ao concelleiro Marcos Fajardo, quen levou a área de deportes durante os primeiros momentos do mandato e agora comercio e os servizos, o alcalde destacou que se trata “do principal interlocutor entre a administración e as parroquias, garantindo os servizos mínimos para todos os núcleos”.

Pola súa banda, Raúl Treus, actual concelleiro de Medio Ambiente e Servizos Sociais, implementou unha rede de benestar no municipio que permite, gracias á colaboración entre os Servizos Sociais municipais e as entidades sociais, “prestar un mellor e máis rápido servizo a persoas vulnerábeis”, ao que se suma o seu importante labor en materia ambiental, coa redacción do primeiro Plan Forestal, un documento que garante a seguridade ante futuros incendios forestais.

“Os cinco fixemos un gran equipo e non me imaxino o traballo diario no Concello sen eles. Todos demostraron a súa valía ao fronte das distintas áreas e estou seguro que van a seguir facendo un gran traballo coas novas persoas que se sumarán ao equipo”, recoñeceu Martiño, para quen a coordinación entre departamentos é “de suma importancia con vistas á consecución de obxectivos”. Grazas a esta metodoloxía, dixo, “o Concello de Boiro aumentou significativamente a contía de subvencións de outras administracións”. A modo de exemplo, 1,5 millóns para a renovación da Casa da Cultura, 360 mil euros para o fomento do comercio local e 110 mil euros en materia de residuos só con cargo aos fondos Next Generation, explicou o actual alcalde.

Outros artigos

Publicidade

Revista en papel

Opinión

“Enfermedades terminales”. José Manuel Pena

“Enfermedades terminales”. José Manuel Pena

Estos últimos días las visitas al hospital fueron frecuentes para acompañara un buen amigo que se encuentra viviendo unos difíciles momentos por sudelicado estado de salud. Esta circunstancia me abrió un poco más los ojos ala realidad del sufrimiento, el dolor, el...