O portavoz do Partido Barbanza Independente (PBBI), Vicente Mariño de Bricio, reuniu este luns 29 pola noite a todo o seu equipo para valorar o resultado das últimas eleccións, onde a agrupación acadou 5 actas, constituíndose desta volta como a terceira forza política do municipio, empatada co BNG (segunda). O candidato destacou que malia que a perda de dous concelleiros (nos anteriores comicios lograron 7 actos) “foi un bo resultado pois os electores que depositaron o seu voto ao PBBI, deixaron claro que non querían seguir cun goberno do señor Ruiz”. Mariño destacou tamén que os votantes “valoraron positivamente o seu labor de oposición”, e a súa confianza neste partido “como alternativa de cambio”.
Mariño indicou que agora “son outros os que teñen que decidir se de verdade queren cambiar o rumbo de Ribeira tal e como o manifestaron”.
O voceiro enumerou que hai unha chea de cuestións que xustifican esta nova dirección, e “o resto de grupos deberían analizar estas cuestións”. Mariño sinalou tamén que “existe alternativa”, e que esta alternativa quere poñer de manifesto que “Ribeira non é o que opina unicamente o señor Ruiz”, que as políticas do actual alcalde e o seu equipo “son de amedrentar á oposición” e que as estratexias locais “non se poden basear na imposición de criterios, desbotando as demais propostas”.
Tamén criticou ao Goberno actual polo que cualificou de “política de malgasto e de esquecemento das parroquias”. Indicou que a forma de actuar do Executivo ribeirense “viuse reflectida na mesma xornada electoral menosprezando a compoñentes da lista do PBBI”. Mariño indicou ademais “que a forma de pensar e ver Ribeira non é propiedade do actual Goberno municipal, pois en número de votos son máis os que son contrarios ao rexedor e ao seu equipo”.
Mariño dixo que “unha vez escoitadas as intervencións dos vinte e oito compoñentes da lista electoral” os membros do PBBI decidiron estudar alternativas de goberno municipal “en coherencia co discurso da agrupación”, para “o que están dispostos a sentarse a negociar cos que queiran de verdade un cambio en Ribeira”.
Mariño deixou claro que “calquera apoio ao señor Ruiz sería unha traizón ao noso discurso e aos nosos votantes”.
