A agrupación Nós Pobra, co actual rexedor Xosé Lois Piñeiro á fronte, emitiu un comunicado no que analiza os resultados das eleccións municipais deste domingo, nas que o grupo non acadou as actas que agardaba. Segundo lembran, “a caída nos apoios a Nós Pobra nestas eleccións supuxo baixar dos 2019 votos acadados nas eleccións de 2019 aos 1214 obtidos no día de onte. 805 menos. En porcentaxe pasamos do 36,14 % ao 23,05 %. Os resultados non son bos en absoluto e para nada os esperados pola asemblea, que procurará analizar o porque deste duro castigo por parte da cidadanía”.
No comunicado Nós Pobra recorda que o Partido Popular perde igualmente votos, pasando de 1.968 a 1.921, sen embargo incrementa a súa porcentaxe de 35,23 % a 36,47 %, o que lle permite por escaso marxe subir de 5 a 6 concelleiros/as.
Pola súa banda, comentan, “o BNG experimentou unha lixeira subida de 789 a 936 que o mantén en dúas actas, o PSOE baixou de 751 a 631 e tamén se mantén na única acta coa que contaba e, a maiores, VixP vai entrar na Corporación Municipal cunha acta de concelleiro grazas a acadar 495 apoios”.
E engaden: “Ningunha das forzas presentadas acadou a maioría absoluta necesaria para afrontar con seguridade a sesión de investidura e calquera que desexe presentar candidatura á alcaldía deberá procurar apoios noutros partidos ou esperar a que os demais non cheguen a un acordo. Os seis concelleiros e concelleiras do PP permítenlle presentarse coa certeza de que calquera outro candidato ou candidata que se presente precisa do apoio de todas as demais forzas, é dicir, deben votar conxuntamente Nós Pobra, BNG, PSOE e VixP para investir a outra persoa candidata”.
Na análise electoral, a asemblea veciñal Nós Pobra considera que é “a nosa obriga explorar as opcións que existen para chegar a acordos que permitan un goberno alternativo ao que puidera conformar o Partido Popular”.
E engaden: “É a nosa responsabilidade tratar de consolidar todas as liñas políticas e accións de goberno establecidas nos últimos 8 anos de goberno, moitas das cales corren o risco de desaparecer baixo un goberno popular. Por iso imos falar coas outras tres forzas necesarias, con xenerosidade e honestidade, sendo conscientes do peso que cada unha ten dentro da Corporación e co obxectivo de formar un goberno estable e forte. Se isto non é posible, asumiremos a responsabilidade de liderar a oposición, que exerceremos de maneira construtiva”.
Respecto das opcións para formar goberno, din que de “cara á sesión de investidura hai dúas posibilidades principais”: ou ben a alcaldía para o Partido Popular co apoio de VixP, que suporía unha investidura apoiada por 2.416 votos fronte ao rexeitamento de 2.781 que sumamos Nós Pobra, BNG e PSOE; ou ben a alcaldía para Nós Pobra co voto favorable de VixP, BNG e PSOE, que suporía unha investidura apoiada por 3.276 votos fronte a 1.921″.
