Manuel Ayaso (Aguiño, 1934) faleceu a última hora deste luns aos 89 anos de idade. Facía varios meses que o seu estado de saúde era delicado.
O aguiñense emigrou a EEUU aos trece anos, levando unha formación básica e un mundo de tradicións galegas que caracterizarían o seu mundo pictórico. Alí obtivo unha bolsa na Escola de Newark (1953-1956), onde se aproximou ao debuxo, a pintura, a cerámica e a escultura. Nacionalizouse americano e incorporouse ao Terceiro Exército dos Estados Unidos en Atlanta, no que se ocupou do deseño de obras de teatro e baile. O Centro de Oficiais, con coñecemento do seu talento, asignoulle un estudo propio no que xurdiron as súas primeiras obras, que vendeu na Nova Galería de Nova York.
En 1959 realizou a súa primeira viaxe a España, e na súa visita ao Museo do Prado achou referentes e influencias para o seu traballo (Goya, Picasso, O Bosco, Leonardo…). Un ano máis tarde regresou a Estados Unidos e comezou a traballar coa prestixiosa galería neoiorquina Cober Gallery, obtendo o Premio Trubeck do Monclair Art Museum.
En 1963 foi bolseiro pola Fundación Tiffany, o que lle permitiu residir durante ano e medio en España e aproveitar para empaparse do universo artístico do Museo do Prado. Ao seu regreso foi fichado pola Forum Gallery, a súa actividade expositiva viuse intensificada nas décadas dos 70 e 80 e empezou a expoñer en importantes cidades de EEUU e Canadá.
Ao longo da súa traxectoria a súa obra incorporouse a destacados museos, así como a distintas fundacións privadas de EEUU, España, Israel, México e Sudáfrica.
Son moitos os museos que contan con obras súas: o San Francisco Museum of Modern Art, o Museo de Arte Moderna de Nova York (MOMA), o Whitney Museum of American Art, o Crystal Bridges Museum of American Art de Bentonville, o Worcester Museum, The Pennsylvania Academy of the Fine Arts, o University of Oregon Museum of Art, The Arkansas Arts Center, o Monclair Art Museum, a American Israel Foundation, The Slaten Memorial Museum, a University of Massachusetts, a Illinois Wesleyan University, The Butler Institute of American Art, o Centro de Arte Contemporánea (Compostela) e, por suposto, o Museo do Gravado de Ribeira e a casa da cultura de Aguiño.
Os restos mortais de Manuel Ayaso están a ser velados no Tanatorio Crematorio do Barbanza, desde onde partirá mañá, ás 18.15 horas, o cortexo fúnebre rumbo ao cemiterio municipal de Ribeira, para o enterro. O xoves, ás 19.30 horas, oficiarase un funeral na igrexa parroquial de Santa Uxía
Manuel Ayaso tras o seu nomeamento pola Corporación como Fillo Predilecto de Ribeira, acto que tivo lugar en primeiro lugar no salón de plenos do consistorio, onde a artista e amiga de Ayaso, Eva Veiga, debullou os méritos que o avalan e tivo lugar a entrega por parte do alcalde do diploma que o acredita como Fillo Predilecto segundo decisión en pleno extraordinario do 10 de xaneiro de 2022.
Actualmente o Museo de Artes de Ribeira ten unha mostra de Manuel Ayaso e Alfonso Costa na que recrean os estilos de Picasso. A mostra, que estará aberta ata xuño, forma parte do programa cultural específico deseñado por este museo en homenaxe ao artista malagueño. Nesta ocasión, Ayaso e Costa, a través das súas obras, recrean temas e estilos picassianos como a tauromaquia, o cubismo, o Guernica ou o circo, entre outros.
Inauguración da mostra o pasado 12 de maio, no que xa non participou Manuel Ayaso
