Esquerda Unida de Boiro presentou unha queixa ante a Valedora do Pobo, a través do seu candidato á alcaldía Néstor Sieira, polo que ao xuízo da agrupación constituiría unha infracción do principio de imparcialidade en período electoral. EU refírese no seu escrito á presentación da candidatura do Partido Popular de Boiro nas eleccións municipais deste domingo 28, na que a actual conselleira de Política Social, Fabiola García, mostrou o seu compromiso co candidato Fernando García Diéguez de iniciar os trámites necesarios para a construción da residencia de persoas maiores “ao día seguinte de gañar as eleccións” en Boiro os populares.
Esquerda Unida tamén lembra no escrito que o dito compromiso foi recoñecido por Fernando García nunha entrevista-debate no Canal Rías Baixas, no programa Contrastes. Estes feitos foron denunciados por EU no dito debate e nas súas redes sociais, “pero ante a gravidade dos feitos procedemos a presentar unha queixa ante a Valedora do Pobo, por considerar se trata dunha actuación en período electoral da conselleira en exercicio das súas funcións, ao darse a entender aos votantes que se o candidato non resulta elixido a Xunta non exercerá as súas competencias para construír a residencia; e dunha infracción do principio de neutralidade”, indica Esquerda Unida.
EU de Boiro solicita á Valedora “que se inicie unha investigación sobre o relato e que no seu día se dite resolución pola que se formulen á conselleira as advertencias, recomendacións, recordatorios e suxestións a que se refire o artigo 32 da Lei do Valedor do Pobo de Galicia”.
