Este sábado 3 de xuño imos ter unha nova oportunidade de coñecer a historia do Pazo de Goiáns (Boiro) e da súa contorna a través dunha visita teatralizada dirixida e orquestrada por Os Quinquilláns. Será a partir das 20.00 horas. Quen estea interesada/o en participar deberá formalizar a súa inscrición na Casa da Cultura de Boiro ou no teléfono 981 84 84 25. As sesións terán continuidade os días 17 e 25 de xuño.
Segundo informa o Concello, organizador destas actividades, as visitas guiadas de Os Quinquilláns preséntanse como unha boa oportunidade para coñecermos, dun xeito ameno e participativo, a historia da construción e da contorna natural que a rodea.
Estas experiencias, engaden dende a Área de Cultural do Consistorio, “teñen como finalidade dar a coñecer o noso patrimonio e a historia do Pazo de Goiáns a través do punto de vista dos personaxes baseados nas persoas que o habitaron”. Por certo que para a elaboración destas visitas teatralizadas realizouse un encontro coa veciñanza dirixido a poñer en común a sabedoría popular e os recordos das e dos boirenses que estiveron vinculados ao Pazo.
