A Xunta Local de Porto do Son da AECC – Asociación Española Contra o Cancro, presidida por María
José Torres Calo, organiza este sábado 3 de xuño a II Gala Benéfica coa finalidade de recadar fondos que contribúan á investigación para a mellora na calidade de vida e a erradicación da enfermidade.
Co cartel de completo desde os primeiros días da súa posta en marcha na promoción do evento, 250 comensais gozarán dunha velada extraordinaria actuando como anfitrión o Real Club Náutico Portosín, colaborando o seu servizo de restauración O Miradoiro, xestionado por M&S Eventos Hostalería, e que tamén contará coa actuación de Bea a de Estrela, que achega o seu mellor música de maneta altruísta en prol da causa común da AECC de Porto do Son.
O Concello de Porto do Son é outro dos benefactores, sensible tamén á causa e participando da cea que contará coa presenza do seu alcalde en funcións, Luis Oujo, e boa parte da súa Corporación municipal.
O animador principal será o televisivo Juan Fuentes, presentador na TVG da revista de tarde Quen anda aí, quen xa conduciu con éxito a primeira edición da Gala Benéfica en 2019.
“A mensaxe que me gustaría trasladar é de que, entre todos, co noso gran de area, axudaremos á investigación na loita contra o cancro, logrando coa nosa achega que esta enfermidade vaia a menos”,
comentaba Torres Calo.
Ao longo da noite poñeranse á venda 2.500 rifas por un importe simbólico de 1€ a unidade, dispoñendo tamén a Xunta Local de Porto do Son da AECC dunha Fila Cero, na que poderá facer un donativo no número de conta ES54 00490007232612124606.
