Esquerda Unida presentou o pasado domingo en Escarabote (Boiro) o seu proxecto para a mellora e humanización do entorno de Agramuíña. Coa axuda dunhas imaxes do proxecto deseñado pola organización liderada por Néstor Sieira, Luís Alonso, integrante da candidatura e veciño da parroquia de Lampón, explicou as liñas xerais da rehabilitación integral de Agramuíña.
A proposta de Esquerda Unida basease na humanización da fachada marítima do peirao de Escarabote, aumentando a zona para as persoas, limitando o tráfico e dotando a contorna con árbores, bancos e zonas de lecer familiar.
O proxecto inclúe a recuperación do edificio da conserva para a cidadanía, co fin de que poida ser utilizado para usos múltiples como pistas para a práctica do deporte, espazos de lecer ou un museo do mar. Segundo lembraron dende a organización de esquerdas, o devandito “dependerá sempre das preferencias e necesidades das veciñas e dos veciños de Escarabote”.
Por último, durante o encontro se presentaron outras medidas para a parroquia de Lampón como unha senda fluvial dende a zona do lavadoiro ata a Madalena ou o arranxo e rehabilitación do camiño ata o colexio público de Escarabote.
