O Concello de Boiro colabora co Club de Baloncesto Santa Baia e a Federación Galega de Baloncesto na organización do Campionato Galego 3×3 na categoría U17. Na presentación, celebrada na tarde deste mércores 3 de maio, participaron a concelleira de Deportes, Dores Torrado; o presidente da Federación Galega de Baloncesto, Julio Bernárdez; o presidente do Club de Baloncesto Santa Baia, Francisco Alonso; e o director deportivo do club, Guillermo Outeiral.
Segundo explicaron, a proba terá lugar o vindeiro mércores 17 de maio no pavillón do CEIP Santa Baia e nela van participar 13 equipos masculinos e 5 femininos procedentes de todo Galicia. “Tratase dunha modalidade moi dinámica e atractiva, que se xoga a media pista e con so unha canastra e que vai servir para dar unha maior visibilidade ao deporte do baloncesto no noso municipio”, afirmou o director deportivo, Guillermo Outeiral.
O 3×3, engadiron, caracterízase por ser partidos de 10 minutos e cun so tempo morto por xogo e no que non hai adestrador. “Esta competición é unha das primeiras deste modelo competitivo e que vai ser o futuro do baloncesto polo seu atractivo e a autoxestión do xogo”, afirmou o presidente da Federación Julio Bernárdez.
A concelleira de Deportes, Dores Torrado, agradeceu o traballo que tanto o Club de Baloncesto Santa Baia como a Federación Galega de Baloncesto están a facer no deporte de base e en inculcar valores como a educación e o respecto e, concretamente, no apoio a esta modalidade “que está a ser un referente para os rapaces e rapazas que se inician no baloncesto no noso concello”.
