A vertente formativa do Festival Noites de Jazz 2023 (Rianxo), organizada polo Concello de Rianxo coa colaboración da Escola de Música de Rianxo (ao abeiro da convocatoria de Festivais da Deputación da Coruña), centrarase este ano, entre outros ámbitos, na tradición dos grandes conxuntos de jazz, o que se coñece como big bands. As sesións desenvolveranse na Escola de Música de Rianxo, os martes e xoves de xullo, de 10:00 a 14:00.
Caracterizada como a formación insignia da música jazz,” a big band representa non só un esforzo musical maiúsculo, senón a espectacularidade que este tipo de música desenvolveu sobre todo nos anos 30 e 40, de forma que para moita xente Jazz e gran banda jazzística son case sinónimos”, explican dende a organización, engadindo que o curso reserva un 50% de prazas para mulleres e centrarase en clases teórico-prácticas que achegarán no só os diversos contidos técnicos que esixe a interpretación (e a improvisación) neste tipo de formacións, senón tamén obrigadas referencias a contextos históricos (con especial referencia á desigualdade de xénero e aos marcos de pobreza e exclusión social que caracterizaron o nacemento do jazz e que tamén eran propios das big bands), músicos, temas, etc.
O remate do curso será, precisamente, o concerto inaugural das veladas nocturnas do Festival, que será o mércores 2 de agosto.
Como dixemos, as sesións desenvolveranse na sede da Escola de Música de Rianxo (rúa Rinlo), os martes e xoves de 10:00 a 14:00 horas, baixo a dirección e docencia de Alfredo Susavila (director da sección de Jazz da Escola de Música de Rianxo) e a docencia tamén de Bernal Muíños (membro do Cuarteto TbA).
Máis información en escolademusicarianxo@gmail.com e no telf 671058555
