Este sábado 27 de maio prosegue en Boiro o protagonismo do audiovisual, poñendo o foco no mellorciño das colleitas máis recentes. Así, logo do completo menú do festival Olloboi proxectarase na Casa da Cultura de Boiro, o sábado 27 a partir das 20.00 horas, o filme As Bestas de Rodrigo Sorogoyen, un dos máis grandes e históricos hits do cinema galego (de público e de crítica). As entradas están dispoñíbeis en liña e tamén, na billeteira da Casa da Cultura dende unha hora antes da proxección.
O filme As Bestas está protagonizado por Denis Ménochet, Marina Foïs, Luis Zahera e Diego Anido. Está ambientado en Galicia e foi rodado en galego, francés e castelán. Inspirado nos feitos reais que lles ocorreron a unha parella neerlandesa en Santoalla, o filme conta a historia dunha parella francesa (Ménochet e Foïs) asentada no campo galego, e, segundo explica a Galipedia, “explora cuestións de xenofobia e a escalada na hostilidade entre veciños impulsada por un conflito por un proxecto de parques eólicos”.
Estreouse internacionalmente na 75ª edición do Festival de Cannes o 26 de maio de 2022, e tamén se proxectou nos festivais de Donostia, Toquio e Chicago. Estreouse nos cinemas de Francia o 20 de xullo de 2022 e nos de España o 11 de novembro de 2022.
As bestas conseguiu 17 nomeamentos na 37ª edición dos Premios Goya, e gañou en 9 categorías, incluíndo mellor filme, director, guión orixinal, actor (Ménochet) e actor secundario (Zahera).
