O Servizo de Orientación Laboral da Asociación Amicos segue avanzando na prestación de apoio e a orientación das persoas en situación de vulnerabilidade e incorpora, por terceiro ano consecutivo, un programa exclusivo para mulleres en situación de violencia de xénero: o programa de intermediación laboral deste colectivo en risco.
Neste senso, a entidade da nosa comarca dá servizo a máis de 1000 persoas con discapacidade ou situación de vulnerabilidade. O pasado ano, o servizo de orientación laboral acadou que 301 persoas atoparan emprego.
O obxectivo principal deste programa específico para mulleres é “acadar a mellora da ocupabilidade e a inserción laboral das mulleres participantes combinada coa concienciación e mediación co tecido industrial da comarca”.
O programa inclúe formación especializada para o emprego: a actividade Envasado, acondicionado
e embalaxe de produtos alimentarios combinada co curso de Manipulador de alimentos.
Ao remate da formación as persoas asistentes terán a posibilidade de realizar prácticas non laborais.
Actualmente o programa atopase no proceso de selección das participantes inscritas nas oficinas de emprego de Boiro e Vilagarcía e estará activo ata finais de outubro. Keltoi Cameán, coordinador de orientación laboral da Asociación Amicos, incide: “A colaboración e sensibilización activa das empresas para a inserción sociolaboral deste colectivo é moi importante, intentaremos acadar que un terzo das participantes atopen emprego”.
Por outra banda, Berta Miguens, orientadora da asociación, recalca o seguinte: “Desenvolveremos itinerarios personalizados e específicos segundo a situación de cada muller tratando de mellorar a situación sociolaboral e activando posteriormente grupos de auto axuda”.
Este programa é posíbel grazas ao financiamento da Secretaria Xeral de Igualdade da Xunta de Galicia e o Ministerio de Igualdade do Goberno de España.
