A Plataforma Stop Desahucios Barbanza informou do resultado positivo das xestións levadas a cabo, xunto coa Oficina da Valedora do Pobo, para mellorar a situación de alta vulnerabilidade dunha familia de Ribeira de catro membros que se atopaba en risco de quedar sen vivenda. Segundo lembra a plataforma, a Oicina da Valedora do Pobo instou á entidade financeira de Unión de Créditos Inmobiliarios (UCI) do Grupo Santander a permitir a concesión dun alugueiro social para a devandita familia de Ribeira, o que evitaría o desafiuzamento sinalado do seu domicilio, por parte do Xulgado Número 1 de Ribeira, para esta mesma semana (este mércores 3 de maio). A plataforma informou de que finalmente a entidade UCI do Grupo Santander concedeu o alugueiro social á familia de Ribeira. Con esta decisión suspéndese o procedemento xudicial de execución hipotecaria, deixando sen efecto o desaloxo da familia, que contará co impotante apoio dun custe de alugueiro a un prezo asumíbel e por un período de cinco a sete anos.
