Mergullados xa na semana das Letras Galegas, a nosa terra é un fervedoiro de actividades arredor da festa cultura do 17 de maio, adicada este ano a Francisco Fernández del Riego. Entre as entidades que están a celebrar a nosa festividade cultural por excelencia atópase a Biblioteca Municipal de Noia, que informou que as persoas que se acheguen ás súas instalacións esta semana e leven en préstamo algunhas das obras dos seus fondos recibirá de agasallo un libro (un por persoa e día).
Dende a Biblioteca queren conmemorar deste xeito a relevancia especial que ten esta edición 2023 da festividade, xa que “por unha banda cumpre sesenta anos a celebración do Día das Letras Galegas e pola outra está adicada ao seu principal promotor Francisco Fernández del Riego, quen o 20 de marzo de 1963 presentaba na Real Academia Galega, co apoio dos tamén académicos de número Gómez Román e Ferro Couselo, a proposta de crear unha “xornada oficialmente adicada a honrar os nosos libros”. Foi, polo tanto, o inicio da festividade do 17 de maio.
