Os vindeiros 28 e 29 de abril celebrarase en Rianxo un festival de música clásica na Sala Arcos Moldes do Auditorio de Rianxo. Segundo explican dende a Área de Cultura do Concello, organizadora do certame, o programa contará con dous días de concertos de alta calidade, con recoñecidos músicos do panorama galego e internacional.
O venres 28 de abril, veciños e visitantes poderán desfrutar dun recital de piano a cargo do músico de orixe rianxeira Adrien Gey-Galera, quen nos brindará unha selección de obras de diferentes compositores clásicos, o concerto terá lugar ás 21.00 horas.
O sábado 29 de abril será a quenda dun concerto de música de cámara, que será interpretado polo Conxunto Daphnis. Este grupo está composto por Mathieu Guignier no violín, Hans-Ljuben Richard na viola, Alec Fukuda no violonchelo e Adrien Gey-Galera de novo ao piano. O concerto tamén terá lugar ás 21.00 horas.
Os programas dos dous concertos incluirán obras de Beethoven, Rachmaninov, Brahms, Albeniz, Chopin, Franck, Dvorak e Schumann.
As entradas serán de balde ata completar capacidade e poderán ser retiradas dende unha hora antes do comezo dos concertos.
