Este venres 29 de abril o humor con selo galego será protagonista no concello de Porto do Son. O motivo non é outro que a actuación do presentador, humorista e narrador Isi na Casa da Cultura de Portosín, a partir das 20.00 horas. As entradas puideron adquirirse nas Casas da Cultura de Porto do Son e Portosín, na Librería Andrea (Porto do Son) e na Libraría Elisa (Portosín). A actuación encádrase no Ciclo de Monólogos do Concello, baixo a marca local Infinitamente Natural, xunto coa protagonizada os días pasados por Pepo Suevos, o día 15 de abril, desta volta na Casa da Cultura de Porto do Son.
Sobre Isi
José Manuel Rodríguez Puente, máis coñecido como Isi, naceu na Estrada o 28 de maio de 1973 e é un humorista, actor e presentador de televisión galego. É coñecido por actuar en diferentes programas e series da Televisión de Galicia, como SuperMartes, Air Galicia, Land Róber ou Todo queda na casa.
