A Consellería de Cultura, Educación, FP e Universidades xa remitiu aos sindicatos a súa proposta de calendario escolar para o curso 2023/2024, que volve recoller que todas as etapas –Infantil, Primaria, ESO, Bacharelato e FP– arrincarán e concluirán á vez as clases: do venres 8 de setembro ao xoves 20 de xuño, ambas as datas incluídas.
As únicas excepcións, como vén sendo habitual, serán 2º de Bacharelato, xa que o fin do período lectivo dependerá das datas da Avaliación para ou Acceso á Universidade (ABAU); e os ensinos de réxime especial, que terminarán o 28 de xuño.
Así figura no borrador remitido ás organizacións representadas na Mesa Sectorial –CIG, UXT, CCOO, ANPE e CSIF–, órgano que se reunirá o próximo 18 de abril para abordar o calendario.
A proposta da Xunta recolle que as vacacións de Nadal serán do venres 22 de decembro ao venres 5 de xaneiro, de forma que os alumnos reincorporaríanse o luns 8. Ademais, as de Entroido serán do luns 12 ao mércores 14 de febreiro e a Semana Santa irá desde o luns 25 de marzo ao luns 1 de abril, que tampouco haberá clase.
Á parte destes períodos, a Xunta fixou o Día do Ensino para o xoves 7 de decembro, entre os festivos do mércores 6 e o venres 8. Ademais, os colexios e institutos terán liberdade para escoller un ou dous días no caso de que algún dos festivos locais caia en xornada non lectiva. Os centros deberán remitir as súas propostas á Administración autonómica antes do 20 de outubro.
