No terceiro trimestre do actual curso entrarán en funcionamento os Camiños Escolares Seguros en dous centros educativos do núcleo urbano da Pobra. O Concello quixo deseñar deste xeito un itinerario que parte da praza Alcalde Segundo Durán, para seguir por rúas peonís ata o inicio da rúa Venecia, onde se bifurca para se dirixir ao CEP Salustiano Rey Eiras e ao IES da Pobra do Caramiñal a carón da estrada. Amais, procedeu á colocación de sinalización horizontal e vertical. En canto a esta última, o camiño que leva ao centro da primaria conta co distintivo dun lapis, mentres que o da secundaria consiste nunha mochila.
O concelleiro da Mobilidade, Xabier Santos (BNG), xunto coa súa homóloga dos Servizos Sociais, Amparo Cerecedo (BNG), e a xefa de estudos do referido centro educativo da primaria, Daniela Martínez, explicou que o obxectivo é “recuperar a tradición de camiñar xuntas e xuntos á escola dunha maneira segura”.
Deste xeito, o proxecto iníciase con dous tramos que se ampliarán a un terceiro no vindeiro ano académico.
Previamente, fíxose un estudo para determinar a viabilidade da iniciativa, efectuáronse intervencións necesarias e repartíronse enquisas entre o alumnado. Tamén se contará con voluntariado para esta ruta, ademais de establecementos hostaleiros e comerciais colaboradores por se a rapazada se perde ou se sente indisposta durante o traxecto. Xa á volta da Semana Santa impartiranse charlas e repartiranse chuvasqueiros e material informativo.
O edil apuntou que este programa actúa “en diversas vertentes”: pedagóxica, ao fomentar hábitos saudábeis e o desenvolvemento da autonomía do alumnado; ambiental, ao diminuír a emisión de gases contaminantes e os ruídos; urbana, coa mellora do tráfico na contorna dos colexios; e política, ao impulsar un modelo de concello “moito máis humano.” Santos agradeceu a implicación no proxecto, especialmente, da comunidade educativa.
En representación do CEP Salustiano Rey Eiras, Daniela Martínez amosouse partidaria do percorrido a pé ata os colexios e informa do apoio a esta iniciativa que o incentiva de maneira segura.
