O Concello da Pobra confirmou que estes primeiros días de abril comezará a segunda fase da intervención no Polideportivo de Venecia. Así o fixeron saber o alcalde da Pobra do Caramiñal, Xosé Lois Piñeiro (Nós Pobra), e a concelleira dos Deportes, Genoveva Hermo (Nós Pobra).
A actuación principal será a substitución da pista. Tralas reunións coas entidades deportivas que fan uso desta instalación, determinouse que “a mellor opción era a colocación de pavimento deportivo área-elástico cun acabado en madeira de faia”, explicaron, engadindo que tamén se operará nas varandas e a cerrallaría metálica; procederase a pintar o interior e mailo exterior; renovarase o corredor inferior da bancada principal; realizarase a pavimentación das bancadas con revestimento elástico para interiores a base de resina epoxi; farase unha reforma dos aseos para favorecer a accesibilidade; colocaranse dúas novas portas exteriores e realizarase a reparación doutras tres; e executarase unha mellora da accesibilidade e iluminación.
Sotega Noroeste resultou ser a empresa adxudicataria por un importe de 229.813’61 euros, cun prazo de execución de cinco meses. O rexedor apunta que estas obras complementan a do cambio da cuberta, executada pola vía de emerxencia no pasado ano, polo cal o investimento total nesta dependencia supera os 450.000 euros. Mestres tanto, trasladarase a actividade dos clubs que fan uso dela ao Polideportivo da Tomada e edificios municipais de Ribeira.
