A Piscina Municipal de Boiro acolle o vindeiro sábado 22 de abril a 4º xornada da Liga Infantil de Natación, a primeira competición oficial que se celebra nas instalacións logo da súa homologación. A concelleira de Deportes, Dores Torrado, e o director técnico do club, Carlos Brión, participaron na presentación da proba.
A competición, que prevista para este sábado 22 de abril a partir das 17.00 horas, vai acoller a preto de 100 nadadores de clubs de diversas partes de Galicia. Na proba participan rapazas de entre 13 e 15 anos e rapaces de entre 15 e 16 anos.
“Contamos con varios nadadores do noso club que compiten para mellorar marcas e clasificarse para competicións autonómicas e nacionais”, afirmou o director técnico do Club de Natación Boiro, Carlos Brión.
A deste sábado vai ser a primeira proba oficial dende a homologación das instalacións que, tal e como afirmou a concelleira, “foi posíbel conseguir gracias ao traballo coordinado entre o Club e o Concello”. Esta homologación, coa que se van poder disputar probas oficiais como a deste sábado, vai permitir ao Club de nadadores de Boiro mellorar os resultados da súa actividade deportiva.
O Concello de Boiro continúa a traballar para a mellora das instalacións co obxectivo de prestar un mellor servizo. “O seguinte paso será a ampliación das instalacións e a dotación da piscina dunha gradaría que permita desfrutar das competicións como a deste sábado”, recoñeceu a concelleira.