O Concello de Boiro celebra os días 20 e 21 de abril a I Feira de Emprego do Barbanza no Centro de Formación e Viveiro de Empresas de Espiñeira co obxectivo de “promover e facilitar a relación entre o tecido empresarial e as persoas demandantes dun posto de traballo”. A cita busca tamén mostrar as principais estratexias en formación e selección que se están a levar a cabo por parte das organizacións empresariais máis representativas da zona.
A feira comezará o xoves coa recepción e apertura a partir das 9.30 horas. Ás 10.00 terá lugar o primeiro foro, nomeado Eixes de desenvolvemento económico do Barbanza, no que van participar José Ramón Romero García, alcalde de Boiro e presidente da Mancomunidade Barbanza Arousa; Beatriz Sestayo, xerente de SEA S.L.; e as empresas JJ Chicolino S.L. e CONGALSA S.L. O foro estará moderado por Carlos Muñiz, concelleiro de Promoción Económica e tratará sobre as problemáticas de xerar emprego e medrar como empresa; a falta de solo industrial e as necesidades de diversificación económica da comarca.
O segundo dos foros, Estratexias en materia de formación e emprego, celebrarase ás 12.00 horas e contará coas intervencións de Zeltia Lado, directora xeral de formación para o emprego e orientación; Nuria Figueira, de JEALSA S.A.; Ángela Seoane, directora territorial de Nortempo ETT; Sonia Arias, responsábel da dinamización da relación con empresas do Barbanza, Muros e Noia e FP dual. Este segundo foro estará moderado por Juancho Armental, fundador e director xeral do grupo Arestora e tratará sobre a retención de talento, as necesidades de conciliación, perfís máis demandados, formación, experiencia, e o emprego en persoas con discapacidade.
O programa continúa o venres con obradoiros orientados a demandantes de emprego. Ás 10.00 horas Iria Montero e Raquel Suárez de Nortempo ETT impartiran un taller sobre Busca activa de emprego no que se tratarán contidos sobre estratexias e elaboración de currículos, uso de redes sociais, como enfrontarnos a unha entrevista de traballo… Ás 11.00 horas Tomás Estévez, xerente da ABE, impartirá un obradoiro sobre Emprendemento, autoemprego e creatividade no que se explicarán claves para emprender e sobre o tecido empresarial.
Ás 12.00 horas Domingo Álvarez Agudo, especialista en orientación vocacional e profesional impartirá o taller de Orientación profesional que tratará sobre a importancia da ESO, FP a distancia, formación en capacitación profesional para a mellora da empregabilidade e a necesidade de capacitación dixital.
Ás 13.00 horas celebrarase o último dos obradoiros, o de Inserción laboral de persoas con discapacidade e en risco de exclusión, impartido por Rocío Vázquez Fernández, da Asociación Amicos, e que tratará sobre estratexias de posibilidades de inserción de persoas con discapacidade.
O acceso aos foros do xoves 20 é libre e están destinados a empresas e público xeral. Para os talleres do venres 21 requírese inscrición previa mediante o formulario dispoñíbel na web municipal.
