Esta fin de semana a rúa Peonil de Boiro, a carón do Mercado Municipal, vai acoller un concerto urbano da agrupación boirense D’Crooners Band, na actualidade mergullada nunha xira acabada de arrancar: a xira All in pola xeografía galega. A cita será este sábado 29 de abril a partir das 20.00 horas.
D’Crooners Band é un novo proxecto musical boirense no que milita Michael J. Rey, unha das grandes figuras emerxentes da música galega, que acadou unha gran repercusión durante a pandemia coas súas actuacións na praza da Mancomunidade de Boiro, actuacións nas que interpretou (entre outros) a Nino Bravo, Pucho Boedo, Elvis Presley, U2 e mesmo pezas da tradición operística, e que logo se converteron en virais a través das redes sociais.
