O Concello de Ribeira sacou a licitación o proxecto para cubrir e renovar o parque infantil da Capela, en Carreira, e para mellorar o de Parte ao Río, situado na mesma parroquia: unha dobre actuación que conta cun orzamento de 179.566,21 euros, IVE incluído, e un prazo de execución de dous meses.
O obxectivo concreto destes traballos é “poñer a punto ambos parques infantís creando dous espazos renovados que satisfagan as necesidades dos veciños”. Para isto, o parque de A Capela vai ser desmontado por completo e resituado nun lateral da pista, “creando unha superficie de xogo máis ampla na que se recolocarán varios dos elementos existentes e instalarase un equipo combinado novo de maior tamaño e con máis prestacións que o actual”, sinalou o Concello, engadindo que “toda esta superficie disporase sobre un pavimento de caucho continuo e sobre a mesma colocarase unha cuberta téxtil soportada sobre unha estrutura metálica”.
En canto ao parque a Parque ao Río, desmontarase os brinquedos actuais e situarase o equipo combinado da Capela, ademais de recolocar un columpio, un balancín e un xogo-resorte. Amais, pavimentarase toda a área de xogo con caucho continuo.
O investimento está incluído no Plan Provincial de Cooperación ás Obras e Servizos de Competencia Municipal (Plan Único de Concellos) POS+2022. As empresas interesadas dispoñen ata o 3 de abril á medianoite para presentar as súas ofertas a través do Sistema de Licitación Electrónica da Xunta de Galicia (SILEX).
