M. A.- Partido decisivo para o Rotogal Boiro Voleibol. Os da Cachada visitan este sábado 4 de marzo, ás 18.00 horas en Son Moix, ao Club Vóley Palma, antepenúltimo clasificado da Superliga 1. Os de Emilio Palacio necesitan sumar os tres puntos para manter posibilidades matemáticas de alcanzar a permanencia. Os baleares, pola súa banda, certificaríana en caso de bater ao conxunto boirense.
O Rotogal Boiro Voleibol afrontará un duelo ante un rival ao que nunca bateu na máxima categoría. Sobre a necesidade de vencer ao Vóley Palma para evitar a perda de categoría, o técnico Emilio Palacio sinala que “imos tentar sacar puntos para non descender, pero todos estamos preparados para asumir o que veña”.
Sobre o rival de mañá, Emilio Palacio afirma que “cambiou moito con respecto á primeira volta. Perdeu a Xavi Folguera, que era un referente, pero ficharon outro colocador, un punta e un central e agora teñen un equipo superior á primeira volta. Haberá que asumir riscos para facerlles dano”.
Por parte do Rotogal Boiro Voleibol, o colocador Jaime Arjones é dúbida por unhas molestias e no adestramento matinal deste sábado coñecerase se pode participar no partido ante Vóley Palma.
O Palma rexistrou variacións no persoal ao longo da tempada. Perdeu xogadores importantes como o colocador Xavi Folguera ou o central Carlos Manuel de Carvalho. O líbero José Osado e o central Cristian Palacios son dúas das pezas destacadas do equipo no que o xogador-adestrador Abel Bernal achega experiencia e poderío no saque.
Precedentes
Tempada 2022-2023
Rotogal Boiro Voleibol, 1-Palma, 3
Tempada 2021-2022
Rotogal Boiro Voleibol, 2-Palma, 3
Palma, 3-Rotogal Boiro Voleibol, 1
Tempada 2020-2021
Rotogal Boiro Voleibol, 2-Palma, 3
Palma, 3-Rotogal Boiro Voleibol, 2
