O Seminario de Inicio do proxecto Renatur_Outes serviu para dar a coñecer o proxecto que nos próximos anos traballará na recuperación ambiental do río Tins ao seu paso polo núcleo urbano de Outes. O foro contou coa presenza dos reitores das tres universidades públicas galegas, Antonio López da USC, Julio Abalde da UDC e Manuel Reigosa da UVigo; asociacións, colectivos e veciñanza de Outes e a súa contorna, representantes da comunidade educativa, así como representantes do Ministerio para a Transición Ecolóxica e o Reto Demográfico e autoridades locais.
A xornada serviu para dar conta de todos os aspectos do proxecto por parte das entidades participantes. En concreto, explicouse como, no eixo do proxecto, sitúanse a recuperación do bosque de ribeira, o control de especies exóticas invasoras, como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmi, e a limpeza de residuos da contorna fluvial. Ademais, acometerase a sensibilización medioambiental mediante accións de voluntariado, formativas e divulgativas, fomentando a participación pública da cidadanía de Outes mediante sesións de gobernanza cidadá ao longo de toda a vida do proxecto. Desde xeito, non só se pretende alcanzar unha recuperación e mellora da biodiversidade, senón tamén xerar un compromiso social máis alá da propia vida do proxecto.
Logo da primeira sesión de gobernanza coa cidadanía e colectivos locais, a sesión rematou cunha pequena andaina polas marxes do río onde se realizou unha intervención simbólica de eliminación de especies exóticas e plantación de autóctonas, guiada pola Fundación Montescola e persoal experto das universidades en colaboración co colexio e instituto locais.
Liderado polo Concello de Outes, Renatur_Outes conta coa participación de persoal investigador das tres universidades públicas galegas, a Fundación Montescola e o CEER (Centro de Estudos Eurorrexionais Galicia- Norte de Portugal), xunto co apoio da Fundación Biodiversidad do Ministerio para a Transición Ecolóxica e o Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
