A sala de sesións do Consistorio de Ribeira vai acoller a semana vindeira a presentación do libro Poemarios, obra póstuma do ribeirense Agustín Fernández Oujo (1906-1978). O evento terá lugar ás 20.30 horas do xoves 23 de marzo, coincidindo co 117º aniversario da concesión do título de Cidade a Santa Uxía de Ribeira polo Rei Alfonso XIII.
Con 420 páxinas de extensión, o volume está editado polo Concello de Ribeira e recolle máis de 150 poemas, distribuídos en dous apartados titulados Poemario de reflexiones y consideraciones cristianas e Poemario de inspiraciones, pensamientos y versos.
Xunto aos escritos de Fernández Oujo intercálanse diversas fotografías antigas con vistas do municipio e outros documentos de interese.
Ademais do alcalde Manuel Ruiz, tamén está prevista a intervención no acto do fillo do autor, Agustín Fernández Martínez, que se desprazará expresamente dende o Principado de Asturias para participar.
Ao remate do mesmo repartiranse exemplares de balde entre as persoas asistentes. A entrada é libre.
O autor
Carpinteiro de profesión, Agustín Fernández Oujo é autor de obras como Mis Jornadas Poéticas en Avilés (1963) e En un saliente de las Rías Bajas de Galicia (1972). Faleceu en 1978 na localidade asturiana de Avilés. Dende 1991 conta cunha rúa na súa homenaxe no casco urbano ribeirense e no ano 2011 tivo lugar a edición polo Concello de Ribeira un primeiro libro póstumo titulado Homenaje poético a la comarca ribeirense de las Rías Baixas.
Cómpre lembrar por outra parte que o próximo 23 de marzo é tamén a data na que finaliza o prazo de entrega de obras candidatas á novena edición do Concurso de Novela Curta Cidade Centenaria de Ribeira.
