O Concello de Outes vai organizar nas vindeiras vacacións de Semana Santa unha actividade para facilitar a conciliación laboral e familiar das familias. Trátase do Campamento Tempo de Pascua 2023, para nenas e nenos de idades comprendidas entre os 3 (escolarizados) e os 12 anos. Quen precise máis información sobre esta iniciativa pode consultala na web do Concello.
Trátase dunha iniciativa do Centro de Información á Muller (CIM) de Outes.
Este campamento, enmarcado no programa Outes Concilia, levarase a cabo os días 3, 4, 5 e 10 de abril, en horario de 8:00 a 16:00 h, no edificio autónomo do CEIP Plurilingüe de Outes.
Segundo explica o CIM, as familias poderán “facer uso do servizo en función das súas necesidades, permitíndose as entradas e as saídas flexíbeis”. As nenas e nenos terán opción de almorzar e xantar no servizo, sendo as familias as encargadas de aportar os alimentos en termos e neveiras. As prazas serán limitadas. O prezo público establecido na ordenanza reguladora corresponde e ascende a 15 € o total do campamento.
