O pleno da corporación municipal de Outes aprobou, nunha sesión de urxencia celebrada este venres 17 de Marzo, o inicio do expediente para a sinatura dun convenio coa Deputación da Coruña destinado á ampliación e renovación do cespede artificial do campo de futbol de Outes. Segundo indicou o alcalde, Manuel González, trátase dun convenio no que o goberno local leva meses traballando, logo de constatar a necesidade urxente de renovar o cespede artificial do campo municipal do Conchido, na Serra de Outes. A actuación que se pretende desenvolver non implica unicamente a renovación do cespede artificial, senón tamén a ampliación das dimensións do propio campo de futbol, para cumplir así cos estándares regulamentarios. O custe total do proxecto ascende a 276.000 €, dos cales á Deputación achegará 140.000 € mentres que o concello se compromete a achegar o resto do importe que, segundo anunciaron dende o goberno local, procederá ben de fondos propios ou ben de axudas doutras administracións. González amosou a súa satisfacción e agradecemento polo compromiso adquirido pola Deputación da Coruña, e polo seu presidente, para cofinanciar esta obra. Do mesmo xeito o alcalde indicou que se rubrica o compromiso do actual goberno co fútbol de base e co Outes Fútbol Club, compromiso iniciado xa en 2019 coa substitución da cuberta do graderío, seguido coa construción dun almacén e coa próxima mellora do alumeado do campo de fútbol.