Este domingo 12 de marzo, ás 13.00 horas, o salón social do Real Club Náutico Portosín acolleu o acto de entrega da Medalla de Ouro do Concello de Porto do Son ao deportista do devandito club Iago López Marra. A distinción veu dada, en palabras do Concello, “polo brillante palmarés” do regatista, que inclúe, entre outros logros, unha dobre participación olímpica (en Brasil e Toquio), o recoñecemento como Subcampión do Mundo e as distincións de dobre Campión Europa, en 2016 e en 2019, entre outros grandes fitos deportivos no ámbito da vela.
O acto estivo presidido pola tenente alcalde Maria Maneiro, o concelleiro de Deportes Juan Pouso, o concelleiro de Medio Ambiente, Manuel Deán e os máximos representantes da xunta directiva do Real Club Náutico Portosín, entre os que se atopaban o presidente Jorge Arán, e o comodoro Fernando González.
O regatista distinguido aproveitou o acto para mostrar o seu agradecemento polo labor do Real Club Náutico de Portosín no impulso do do deporte. Tamén tivo palabras de agradecemento para o Concello, por telo agasallado coa máxima distinción local.
