Juan Pérez Martínez, máis coñecido como Xandomar, falecía aos 90 anos de idade, deixando un importante legado cultural, en forma das pezas que doou ao Museo Municipal e do libro “Antiga dorna polbeira de Castiñeiras”. Exerceu de concelleiro dous mandatos, pero é máis lembrado pola súa faceta de mariñeiro tradicional.
Tras medio século exercendo a profesión, Juan Pérez retirouse, pero non esqueceu o mar que tanto amaba e emprendeu un proceso de investigación que culminou no 2010 coa presentación dun libro: Antiga dorna polbeira de Castiñeiras. Neste volume recollía a súa experiencia profesional, pero tamén testemuños doutros lobos de mar, á vez que falaba de artes de pesca, de carpinteiros de ribeira, do secado do polbo… aderezando o texto con fotos de principios e mediados do século XX.
A súa paixón pola pesca tradicional levoulle tamén a nutrir de varias pezas a colección do Museo Municipal de Ribeira. No 2011 doou diversos obxectos, entre eles, unha réplica dunha dorna.
Na década dos 90, Xandomar compaxinou a súa faceta de armador coa de concelleiro de Medio Ambiente en Ribeira, formando parte do equipo que lideraba o popular José Luis Torres Colomer.
Os seus restos mortais, que están a ser velados no Tanatorio Crematorio do Barbanza, serán trasladados ás 16.30 horas á igrexa do Bo Pastor de Castiñeiras. Tralo funeral, recibirán sepultura no cemiterio parroquial.
