O Concello de Ribeira adxudicou o contrato para a redacción dos proxectos básico e de execución do novo Consistorio de Ribeira, uns traballos que recaeron na firma Carlos Seoane Arquitecto, S.L. O contrato inclúe ademais o estudo de seguridade e saúde, a dirección facultativa das obras e a coordinación de seguridade e saúde, por un importe total de 282.535 euros distribuídos en dous lotes: actuacións sobre a envolvente exterior (200.860 euros) e reforma interior e instalacións (81.675 euros).
Fontes do Concello lembran que este proxecto foi o mellor puntuado do ámbito galego e a número 12 de España entre 1.605 actuacións presentadas ao PIREP (Programa de Impulso á Rehabilitación de Edificios Públicos) convocado polo Ministerio de Transportes, Mobilidade e Axenda Urbana. Froito desta destacada puntuación, o Concello logrou unha axuda de 2.836.394,24 euros de fondos europeos Next Generation.
O Concello engade que “o desenvolvemento da obra vai permitir que Ribeira conte co primeiro consistorio ecoeficiente na comunidade autónoma a través da colocación de fachada de dobre pel, cuberta vexetal con paneis solares e alxibe para utilización da auga de chuvia”, entre outros elementos sustentábeis. O Goberno local pon o foco en que esta actuación contribuirá a “resolver as carencias de espazo para o persoal a través da remodelación do primeiro e segundo andar e máis a planta semisoto, ocupada actualmente polo GAEM e Protección Civil”.
Carlos Seoane
Nos últimos anos Carlos Seoane ten realizado diversas e multipremiadas intervencións dentro do noso termo municipal, tales como a remodelación do miradoiro de Pedra da Ra (Premio Lledó Arquitectura Ibérica, Premio COAG, Premio FAD, finalista nos Premios Arch Daily) e mellora da súa accesibilidade a través do proxecto O Banco do Piñeiro (gañadora na Bienal Española de Arquitectura e Urbanismo, finalista na Bienal Iberoamericana de Arquitectura, finalista do Premio FAD), a construción do Centro Social de Oleiros (Premio COAG, finalista nos Premios FAD) ou a restauración do lavadoiro de Artes (finalista na Bienal Española de Arquitectura e Urbanismo).
