M.A.- Emilio Palacio non continuará como adestrador do Rotogal Boiro Voleibol na tempada 2023-2024. O ata o de agora técnico do primeiro equipo seguirá como presidente do club e, en canto ao primeiro equipo, xa empezou a traballar para elaborar o proxecto deportivo da próxima campaña na Superliga 2.
Adestrador do primeiro equipo do Boiro Voleibol durante quince tempadas, Emilio Palacio explica que “xa levo moitos anos e o ciclo acabouse. Ademais, quero centrarme ao cento por cento nun proxecto persoal laboral”.
Como técnico do primeiro equipo do Boiro Voleibol, Emilio Palacio conduciu ao equipo á elite. Esta tempada, cun equipo composto por xogadores formados na base do club do Barbanza, competiu na Superliga e mesmo pechou a tempada cunha vitoria contra o Téxtil Santanderina (3-2). Á conclusión do partido disputado o pasado sábado, decenas de xogadores que pasaron polo Boiro Voleibol congregáronse na Cachada para homenaxear a Emilio Palacio e agradecerlle a dedicación que tivo durante máis dunha década.
