Cabo de Cruz acolle este sábado día 4 de marzo, a partir das 16.00 horas, a VI Bandeira de Bateis do Concello de Boiro. Disputarase no peirao de Cabo de Cruz, na zona de Curbera. Participarán tripulacións das categorías alevín, infantil, cadete, xuvenil, sénior sub23 e sénior absoluto, tanto masculinas como femininas.
A saída farana en primeiro lugar as tripulacións femininas comezando pola categoría alevín ata a absoluta, e a continuación sairán as masculinas. No caso de que se deban facer máis dunha quenda por categoría, estas serán lanzadas minuto a minuto, saíndo primeiro as tripulacións mellor clasificadas na regata anterior.
Os premios consistirán en medallas de ouro, prata e bronce para os tres equipos mellor clasificados en cada categoría e dúas bandeiras para o club que sume mais puntos cos seus equipos nas categorías femininas e outra nas categorías masculinas.
