A agrupación Boiro Novo vén de emitir un comunicado no que mostra o seu firme rexeitamento aos actos vandálicos rexistrados no concello contra diferentes símbolos da memoria democrática, elementos habilitados durante a actual lexislatura para “dignificar ás vítimas perseguidas polo franquismo”. Segundo informa Boiro Novo, unha parte importante destas actuacións consistiu na colocación de placas e de paneis informativos como o habilitado na fonte de Goiáns ou na praza de Cimadevila.
“Estes paneis”, explica o grupo, “foron vandalizados en varias ocasións tendo que ser limpados e arranxados polo Concello, o que cremos, ademais de ao patrimonio municipal, un grave atentado contra a dignidade das persoas homenaxeadas e unha proba de que o fascismo segue latente na nosa sociedade”.
Por iso, ademais da repulsa a estes actos, a agrupación tamén pide á Corporación municipal que apoie a solicitude ao Goberno do Estado da declaración deste lugares como “Lugares de memoria democrática”, unha figura prevista na Lei 20/2022 de 19 de outubro. Segundo Boiro Novo, esta declaración permitiría endurecer as sancións contra quen perpetra estes actos, podendo chegar ata os 10.000€, “algo que entendemos que pode actuar como medida disuasoria para que non se volvan a repetir”.
Ademais disto, con posterioridade á redacción da moción, o grupo lembra que se vén de perpetrar outra pintada contra a recentemente nomeada (a proposta de Boiro Novo) “Rúa das Traballadoras do Mar”, sendo significativo que se producise na véspera do 8-M e borrando o morfema indicativo do xénero “–as”.
Para o grupo, “non cabe dúbida que se trata doutra pintada, aínda que con temática distinta, de semellantes características que as anteriores, a cal dende a nosa asemblea tamén condenamos e así o expresaremos no pleno municipal”.
