Na mañá deste luns 13 de marzo presentouse no Concello de Boiro o Campus Itinerante IV Ciclo, un programa de envellecemento activo que a Universidade de Santiago de Compostela pon en marcha co financiamento da Dirección Xeral de Maiores e Servizos Sociosanitarios da Consellería de Política Social e Xuventude; iniciativa que se realizará por primeira vez de forma coordinada entre os concellos de Boiro, Ribeira, A Pobra do Caramiñal e Rianxo. Segundo indicaron os responsábeis das catro administracións locais, con este novo exemplo de cooperación entre territorios ponse de manifesto a vontade da Mancomunidade de ir alén da planificación turística, que é o obxectivo primordial da entidade, abranguendo outros ámbitos de acción prioritarios.
Neste proxecto participa Barbanza Arousa, pero tamén diferentes departamentos dos 4 concellos como son Servizos Sociais do Concello de Boiro, Cultura do Concello da Pobra do Caramiñal, Cultura do Concello de Rianxo e Normalización Lingüística do Concello de Ribeira.
O Campus Itinerante do IV Ciclo da Universidade de Santiago de Compostela consta de 6 xornadas con contidos actuais e de interese común repartidas entre os catro concellos. Están destinadas a persoas maiores de 50 anos e profesionais de atención ao maior dos catro municipios de Barbanza Arousa e son totalmente gratuítas.
Estas xornadas comezan en Boiro os días 29 e 31 de marzo, coas temáticas O sono e os seus transtornos, que se realizará no Centro Social de Escarabote, e Saúde cardio saudábel, no Centro Social de Cabo de Cruz.
A continuación, o 11 e o 14 de abril serán as sesións da Pobra do Caramiñal, que se celebrarán no Auditorio do Museo Valle-Inclán e tratarán as temáticas Depresión e Para garantir a integración protexe a vista dos teus ollos. O 25 de abril será o a quenda do Concello de Rianxo coa xornada Nutrición, que se levará a cabo no Auditorio Municipal. A última das sesións será no Concello de Ribeira o día 9 de maio, co título Xenómica e Medicina Personalizada.
Asemade, co obxecto de fomentar a mobilidade, porase un autobús a disposición dos usuarios que o soliciten.
As inscricións están abertas a partir de hoxe de forma presencial, telefónica e por correo electrónico no Concello de Boiro; no Auditorio de Rianxo; no Museo Valle Inclán, na Pobra do Caramiñal e no Centro Cultural Lustres Rivas, en Ribeira.
Na propia inscrición débese manifestar se se vai utilizar o autobús, neste caso é preciso inscribirse con 3 días de antelación ao primeiro dos cursos aos que se desexa asistir. No caso de non utilizar autobús, a inscrición pode realizarse ata o día anterior do primeiro dos cursos no que vai participar.
Dende a Mancomunidade convídase aos veciños e veciñas dos concellos de Boiro, Ribeira, A Pobra do Caramiñal e Rianxo a participar.
