O delegado da Xunta na Coruña, Gonzalo Trenor, e a xerente da área sanitaria de Santiago e Barbanza, Eloína Núñez, visitaron este mércores 1 de marzo o Hospital do Barbanza. Fixérono para informar que a Xunta convocará por concurso de méritos 15 prazas de especialidades médicas neste centro. En concreto, 4 de medicina interna, 2 de pediatría, 2 de análisis clínicos, 1 de xinecoloxía, 1 de traumatoloxía, 1 de radiodiagnose, 1 de anestesia, 1 un de hospitalización a domicilio, 1 psiquiatra e 1 psicólogo. Trenor e Núñez deron a coñecer estes datos na compaña do alcalde de Ribeira, Manuel Ruiz.
Segundo fixeron saber, este concurso convocarase nos vindeiros días e inclúe tamén cinco prazas de pediatría, 1 en Rianxo, 1 en Ribeira, 1 en Boiro, 1 en Noia e 1 en Mazaricos e 10 prazas de médico de familia, 3 en Boiro, 2 en Ribeira, 2 en Rianxo ,1 na Pobra do Caramiñal, 1 en Noia e 1 en Muros.
“Con estas prazas blíndase a estabilidade dos servizos máis críticos do hospital e dos centros de saúde como mínimo nos dos vindeiros anos, nos que se manterá ese núcleo do cadro de persoal fixo que non se moverá nin nas ofertas públicas de emprego nin nos concursos de traslados”, sinalaron, engadindo que esta convocatoria (unha iniciativa que achega máis de 400 prazas para toda Galicia) realizarase ao abeiro da Lei 2/2022 de medidas extraordinarias para a provisión de postos de difícil cobertura, aprobada o pasado outubro polo Parlamento de Galicia e que permite a convocatoria mediante concurso de méritos (é dicir, sen oposición) de prazas en propiedade en categorías como facultativo especialista de atención primaria, pediatría de atención primaria, as especialidades médicas nos hospitais comarcais ou as prazas sanitarias vinculadas á área de Saúde Mental de Galicia.
