O servizo itinerante Coidados Porta a Porta impulsado pola Xunta recalou os días pasados en Dodro. Xoán Bautista Mariño, concelleiro Servizos Sociais e Benestar, achegouse para recibir e facilitar novamente a instalación da unidade móbil.
Grazas ao Fondo de Recuperación Next Generation (Unión Europea) para facer fronte ás consecuencias da COVID, volveu á Paxareira en Dodro outra unidade móbil do programa que puxo en marcha a Consellería de Política Social e Xuventude da Xunta.
Recibiu ás persoas de 55 anos en diante de Dodro que, previa cita, a solicitaron. Estiveron cubertas todas as franxas horarias nos catro días para consultas básicas de podoloxía, audioloxía ou promoción do envellecemento activo entre outros fins. O anuncio polas aldeas, centros públicos e redes sociais fixo que tivera unha boa acollida e esperan por outra edición pasados uns meses.
