O vindeiro venres 10 de marzo, ás 20.30 horas, no salón de actos do Auditorio de Rianxo (primeiro andar) celebrarase a presentación do libro Conversas comigo mesma & Emociones arrítmicas de Anxos Castro Parada e editado por Diverdidad Literaria.
No acto, acompañarán á escritora da Pobra do Caramiñal (afincada en Boiro) Nati Abuín (do grupo de pandeiretas Lumieira), Xulio Gutiérrez (escritor) e Adolfo Muíños (alcalde de Rianxo).
Editado polo selo madrileño Diversidad Literaria, o libro é unha escolma poética de 160 páxinas, en galego e en castelán, na que a autora recolle pezas escritas ao longo de toda a súa traxectoria vital, dende a nenez. Nesta colección vital, Anxos Castro defende a poesía como “a forma máis máxica de comunicación de cantas existen”, que, asegura, “permíteme expresar co que máis me gusta, coa pluma, plasmando sobre o papel todas as miñas emocións”. O libro, explicaba nunha entrevista recente con La Voz, “contén toda a miña traxectoria literaria, desde que tiña 13 anos ata a actualidade, pois sempre fun gardando os poemas que xurdían de todo aquilo que me inspiraba ou me emocionaba”.
O libro foi previamente presentado en Boiro e na Pobra. Agora dáse a coñecer en Rianxo (10 de marzo) e en Ribeira (24 de abril).
