A Casa da Cultura de Porto do Son vai acoller esta finde, o domingo 5 de marzo ás 20.00 horas, a representación do espectáculo Feminissimas, da compañía De Ste Xeito. A sesión será de entrada de balde até completar aforo. Feminissimas é “unha comedia negra moi violeta”, en palabras das integrantes de De Ste Xeito, que nos contan nesta peza a historia de tres amigas da adolescencia que hai anos que non se ven e que coinciden nun Congreso Feminista na cidade de Vigo: tres amigas que teñen tres maneiras distintas de entender a loita polos dereitos das mulleres.
A peza está dirixida por Xavier Castiñeira e con dramaturxia da autora e actriz rianxeira Esther F. Carrodeguas, quen tamén forma parte do elenco xunto con Stephy Llaryora e Noelia Blanco.
