Un total de 25 veciñas de Lousame participaron esta fin de semana nun seminario intensivo de defensa persoal feminina, promovido pola Deputación da Coruña en colaboración co Concello de Lousame. O curso, de catro horas de duración, foi impartido no ximnasio do CPI Cernadas de Castro por técnicos da Escola de Defensa Persoal Policial HKF e foi clausurado pola deputada provincial Sandra González e pola concelleira de Muller e Igualdade de Lousame, Silvia Agrafojo.
Durante esas catro horas, as 25 veciñas de Lousame tiveron a oportunidade de aprender e ensaiar técnicas de autodefensa e protocolos de actuación ante unha posible situación de perigo impartidas polo equipo dirixido polo instrutor policial e experto en defensa persoal feminina José Rodríguez López, quen estivo acompañado polos instrutores Carlos M. Díaz Lence, José Luís Padín Padín e Madó González Fernández.
Unha iniciativa que vén complementar o curso de autodefensa para mulleres organizado o pasado mes de decembro polo Concello de Lousame, en colaboración coa Federación Galega de Loita e a Secretaría Xeral de Igualdade. A próxima cita deste seminario intensivo de defensa persoal feminina será no municipio de Tordoia, o vindeiro mes de abril. O resto dos municipios participantes son Vimianzo (22 de abril), Valdoviño (6 de maio), Ponteceso (20 de maio), Santiso (3 de xuño) e Betanzos (10 de xuño).
