O Concello da Pobra, con cargo ao remanente do POS+2022 da Deputación, presentou os detalles dun proxecto para crear unha pasarela que una a Mercé coa entrada ao Camiño Real, a carón da AC-305. A intervención busca “mellorar a seguridade e mobilidade peonil, ademais de redundar positivamente dende o punto de vista turístico ao discorrer por alí o Camiño de Santiago do Barbanza, A Orixe”. Así o explicaron o alcalde, Xosé Lois Piñeiro (Nós Pobra), e o concelleiro da Mobilidade, Xabier Santos (BNG). O orzamento de execución ascende a 131.804’19 euros (93.677 euros procedentes da Deputación da Coruña e 38.126 euros da Administración local).
A construción desta senda “permitirá continuar o tránsito peonil trala subida ao cruceiro da Mercé, evitando así ter que cruzar dúas veces a estrada para circular a pé en condicións de seguridade ata o inicio do Camiño Real”, segundo explicou Juan Antonio Millán, arquitecto de Cota Cuatro, estudio encargado da redacción do proxecto. O dito viaduto terá unha lonxitude de 135 metros e materializarase sobre dúas trabes de formigón (unha viga pegada a un muro de contención e outra colocada nuns piares) que soportarán un tapiz de plástico reciclado con táboas anti-escorregamento. A maiores, á altura do cruceiro, adecuarase a incorporación á senda cunha plataforma de granito.
“A elección dos materiais responde a criterios de durabilidade, mantemento e redución do impacto paisaxístico”, explicaron.
Na presentación participou o presidente do Camiño de Santiago do Barbanza, A Orixe, Manuel Mariño, xunto coa secretaria, Marián Treus. Mariño precisou que “esta actuación reforzará a seguridade da peregrinaxe, ademais de beneficiar a toda a veciñanza”.
O mandatario local indicou tamén que “queda pendente que a institución provincial aprobe o Plan en pleno para, deseguido, proceder co inicio do expediente de licitación”. Asegurou que se trasladarán máis propostas en materia de seguridade á Xunta de Galicia; organismo que ten a titularidade da AC-305.
